حين يتحول الخيال إلى واقع - هل الميرون مهاجم نيوكاسل هو سانتياغو بطل ثلاثية Goal ?
كلنا بنسمع عن شخصيات وقصص في الأفلام بتكون مبنية على أحداث حقيقية زي Goodfellas او the wolf of the wall street لو هنتكلم في الكورة يبقى تيد لاسو, الحريف, العالمي وحتى شحاته أبو كف.
بس عمرك سمعت عن العكس؟ أن شخصية حقيقية موجودة تكون مبنية على شخصية خيالية من فيلم!!
الموضوع غريب عارف بس ميجيل ألميرون مهاجم نيوكاسل يونايتد يعتبر التجسيد الواقعي لشخصية اللاعب سانتياجو مونيز مهاجم نيوكاسل في ثلاثية أفلام Goal المشهورة.
أغلبنا ممكن يكون مش عارف فيلم Goal, الفيلم بيتكلم عن سانتياجو مونيز, شاب مكسيكي شغال في مطعم صيني عشان يساعد أهله فالمصاريف اثناء حياتهم في امريكا وفي كشافة بيلاحظه وبيساعده يسافر يلعب مع نيوكاسل في انجلترا, ودي تقريبا نفس قصة ألميرون.
بس قبل ما أقارن بين الاتنين خلينا نقول ان نيوكاسل جرب يعمل حاجه شبيه عن قصد قبل كدا لما اتعاقد مع اللاعب المكسيكي سانتياجو مونوز لمجرد تشابه اسمه مع بطل فيلم goal أملاً منهم انه يكون فعلا زي الفيلم بس قعد سنة ورجع المكسيك تاني😂
نرجع لالميرون, المهم ألميرون وسانتياجو مونيز الاتنين لاعيبة من امريكا اللاتينية, الأول من باراغواي والتاني من المكسيك, مونيز اشتغل في مطعم صيني وكذلك ألميرون اشتغل في مطعم صيني, بالإضافة إلى تشابههم في الشكل, واخيرا الاتنين انتقلوا للعب في نيوكاسل يونايتد.
جماهير نيوكاسل كلها تفائلت بانتقال ألميرون بسبب تشابهه فعلاً مع سانتياجو مونيز من الفيلم بس ألميرون مظهرش خالص في اول تلت مواسم ليه مع الفريق ولكن حالياً عامل أداء عالي تحت قيادة إيدي هاو ومساهم في 14 هدف في 27 مباراة من أول الموسم بمعدل 0.583 مساهمة في هدف لكل ماتش.
سانتياجو مونيز في الفيلم قدر يساعد نيوكاسل يصعدوا لدوري الأبطال وبعدها انتقل لريال مدريد وفاز معاهم بدوري الأبطال, الأنظار كلها دلوقتي على ألميرون هل هيقدر يكون سانتياجو مونيز فعلاً ويروح ريال مدريد بعد ما يصعد بنيوكاسل الأبطال خاصة إنهم الرابع ع الدوري وعندهم فرصة كويسة يصعدوا.
غير صدفة ألميرون, فيلم جول منذ صدوره في 2005 ونيوكاسل بيستخدمه نوعاً ما كسلاح سري لإقناع اللاعبين بالإنتقال للنادي. لاعب نيوكاسل السابق, Papiss Cissé, صرح: "إنه يجعل الناس ترغب في اللعب لنيوكاسل", بعد ما اتفرج على الفيلم وهو بيلعب لفرايبورج قبل ما يروح نيوكاسل بعدها بسنة.
اللاعب الانجليزي Isaac Haydeen مدافع نيوكاسل الحالي المعار لنوريتش سيتي كان صرح قبل كدا أنه الفيلم دا فيلمه المفضل أثناء طفولته وانه من وقتها وهو مرتبط بالنادي إرتباط وثيق. كذلك اللاعب البرازيلي Kennedy اتفرج على الفيلم قبل ما يلعب موسم إعارة للنادي.
في لاعبين كتير غير دول لعبوا لنيوكاسل ومشاهدتهم للفيلم كانت عامل في انتقالهم للنادي من ضمنهم الدولي الجزائري إسلام سليماني والأرجنتيني Jonás Gutiérrez اللي فاز معاهم بال championship موسم 2009/2010.
في النهاية, أحب أقول إن فيلم Goal من أجمل الأفلام اللي شوفتها وإن بغض النظر عن ان اللاعيبة دي من أي جزء في الكوكب بس كلهم فاكرين لقطة سانتياجو وهو بيسجل فاول في أخر لحظة ضد ليفربول عشان يبعت نيوكاسل لدوري أبطال أوروبا.
